فى بعض الأمهات و الأباء بيربوا أولادهم تربية صارمة بمعنى ان كل حاجة عندهم بحساب , الاكل و الشرب و الخروج و شراء اى شئ حتى فى اختيار اهدافهم فى الحياة, حتى القيم و المبادئ و العادات و التقاليد بيحفظوها ليهم من غير نقاش , بمعنى آخر ميقدروش يتنفسوا بدون رأى الاب و الام و طبعا دة له تأثير سلبى على الطفل لما يكبر , يعنى تفتكروا ازاى طفل عاش كدة و هو صغير هايقدر يواجه مستقبله لما يكبر ؟؟؟
أكيد هايكون مهزوز فى اتخاذ قراراته , أكيد هايعيش خايف من كل الناس اللى حواليه , أكيد مش هايعرف يكون أسرة , أكيد مش هايعرف يوصل لأى هدف , أكيد بالقيم و المبادئ اللى حفظها هيصدم لما يشوف عكسها فى الدنيا يعنى هايحصل تضارب . مأساة
طيب , فيه بعض الأمهات و الأباء بيربوا أولادهم تربية مرفهة جدآ جدآ , يعنى عكس اللى قلته تماما , أي شئ اولادهم يطلبوه مستجاب , أى شئ يقولوا عليه الاولاد يبقى صح , حتى لو ألفوا عادات و تقاليد على مزاجهم , يعنى تقليد لطريقة الغرب فى تربية اولادهم , يعنى لا يتدخل الاب و الام فى أى شئ يخص اولادهم , مجرد تلبية مطالبهم المادية فقط ,تفتكروا ازاى طفل عاش كدة و هو صغير هايقدر يواجه مستقبله لما يكبر ؟؟؟
أكيد هايكون دايما غلط فى كل تصرفاته , أكيد مش هايعرف يكمل حياته بنفسه , اكيد هايعتمد دايمآ على الاب و الام فى اى احتياجات ليه , أكيد هايمشى فى طريق غلط . برضه مأساة
طيب تقولوا ايه بقى للأب و الام اللى يقولوا سيبوا الاولاد للأيام و هى تعلمهم كل حاجة فى حياتهم و يقولوا ايه كمان (لازم يذوقوا كل شئ عشان يتعلموا كل شئ ) . كارثة , طيب دة مصيره ايه؟؟؟
يا ترى اتربيت ازاى ؟؟؟
كنت تتمنى انك تغير نظام تربيتك ؟؟؟
ازاى عايز تربى اولادك؟؟؟؟
منتظر ردودكم الصريحة الجريئة .......